Еліміздің вокзалдарында кедергісіз орта қалыптасуда
Еліміздің бас теміржол қақпасы саналатын Астанадағы «Нұрлы жол» вокзалы мен республикадағы тағы 63 вокзал кедергісіз орта қалыптастыру бағытында маңызды жобаны іске қосты.
Енді ерекше қажеттіліктері бар жолаушыларды вокзал аумағында қарсы алу, шығарып салу және қолдау көрсету процесі толықтай автоматтандырылып, жаңа жүйеге көшірілді.
Жаңа жүйенің басты артықшылығы – оның қарапайымдылығында. Мүгедектігі бар азаматтар мен балалар сапарға шықпас бұрын bilet.railways.kz сайтынан билет сатып алу кезінде өзіне қажетті көмекті алдын ала белгілей алады. Сайтта қалдырылған өтінім бірден вокзал қызметкерлерінің жұмыс орындарына біріктірілген орталықтандырылған жүйені басқару бағдарламасына автоматты түрде жолданады. Вокзал кезекшілері әрбір 30 минут сайын бағдарламаны тұрақты түрде бақылап, жаңа сұраныстарды бақылауда ұстайды. Жаңа өтінім анықталған бойда кезекші жолаушымен байланысқа шығып, көмек түрін нақтылайды және мәліметтерді бағыттаушы топқа береді. Сапар күні вокзал қызметкерлері жолаушыны кіреберістен немесе автотұрақтан күтіп алып, перронға және вагонға дейін жетектеп барады, ал келу бағыты бойынша вагон есігінен қарсы алып, көлігіне дейін қауіпсіз шығарып салады.
Инженерлік тұрғыдан алғанда мұндай сервистің сапасы вокзалдың ішкі инфрақұрылымы мен құрал-жабдықтардың дайындығына тікелей байланысты. Мысалы, бүгінде «Нұрлы жол» вокзал кешенінде жолаушыларды вагонға қауіпсіз отырғызу және түсіру үшін австриялық Lehner Lifttechnik GmbH компаниясының PL 1400 моделіне жататын 2 арнайы мамандандырылған көтергіш механизмі жұмыс істейді. Бұл шетелдік жабдықтардың техникалық жағдайы өте қатаң бақылауда. Оларға көрсетілетін қызмет бекітілген регламентке сай жүргізіліп, қажетті қосалқы бөлшектер тікелей өндірушіден алдырылады.
Айта кететін жайт, бұл сервис – тегін және тек қана жүріп-тұруды жеңілдетуге арналған әлеуметтік көмек, оның аясына жолаушының жеке жүгін тасымалдау кірмейді.