Пойыздағы санитарлық қауіпсіздік қалай қамтамасыз етіледі?
«Қазақстан теміржолшысы» газетінің тілшісі
Жасыратыны жоқ, әлеуметтік желілерде пойыздарда тарақан немесе бүрге сынды жәндіктердің анықталғаны туралы жолаушылардың шағымдары кездесіп жатады. Әрине мұндай жағдайлар тек Ұлттық тасымалдаушының пойыздарына ғана емес, елімізде қызмет көрсететін 13 жеке тасымалдаушының пойыздарына да қатысты болуы мүмкін.
Егер «Жолаушылар тасымалы» АҚ пойыздарында жәндіктер анықталса, жауапты қызметтер бірден тиісті шараларды қабылдайды. ҚР Денсаулық сақтау министрлігі бекіткен санитарлық қағидаларға сәйкес әрбір жолаушылар вагоны рейске шығар алдында міндетті түрде санитарлық өңдеуден өтеді.
Компанияда жолаушылардың санитарлық қауіпсіздігін қамтамасыз ету мақсатында өңдеудің үш түрі тұрақты жүргізіледі: Дезинфекция – әр рейс алдында жүргізіліп, жұқпалы ауру қоздырғыштарын жоюға және олардың таралуының алдын алуға бағытталған.
Дезинсекция – жәндіктерді жоюға арналған арнайы өңдеу. Оның барысында кенелер, бүргелер, биттер, масалар, шыбындар, құм шыбындары, құмырсқалар, тарақандар және қандалалар секілді зиянкестерге қарсы шаралар қабылданады. Дезинсекция айына кемінде бір рет, сондай-ақ эпидемиологиялық қажеттілік туындаған жағдайда қосымша жүргізіледі.
Дератизация – кеміргіштердің пайда болуы мен таралуының алдын алуға бағытталған кешенді санитарлық шара. Айына кемінде бір рет және қажет болған жағдайда қосымша жүргізіледі.
Әрбір санитарлық өңдеуден кейін вагондардың жай-күйі міндетті түрде тексеріледі. Егер жәндіктер қайта анықталса, вагон қосымша өңдеуден өткізіледі. Қажет болған жағдайда мәселе толық шешілгенге дейін вагонның пайдалануға шығу мерзімі кейінге шегеріледі.
Санитарлық өңдеу жұмыстарын «Жолаушылар тасымалы» АҚ филиалдары осы қызмет түрін жүзеге асыруға рұқсаты бар мамандандырылған ұйымдарды тарта отырып жүргізеді.
Ұлттық тасымалдаушы пойыздарындағы қызмет көрсету сапасы немесе санитарлық жағдай бойынша жолаушылар WhatsApp желісіндегі +7 776 714 5686 нөміріне хабарласа алады. Сондай-ақ әр вагонда орналастырылған QR-кодты сканерлеу арқылы WhatsApp чатындағы операторға тікелей өтініш жолдауға мүмкіндік бар.