Өз өміріңді тәуекелге тікпе...
Тамыз айында Алматы-І станциясының мамандары желілік полиция қызметкерлерімен бірлесіп «Қауіпсіз жол» онкүндігін ұйымдастырды.
Темір жол – қателікті де, салғырттықты да кешірмейді. Көпшілігіміз «пойыз әлі алыста ғой, өтіп үлгеремін» деп ойлап, өз өмірімізді тәуекелге тігіп жатамыз. Ал алып құрам алдағы кедергіні байқап оқыс тежеу берсе де бірден тоқтамайтынын естен шығармаған жөн. Пойыз бір километрге дейін инерциямен жылжи береді. Машинист сізді көріп, апаттық тежеуді қосқанның өзінде пойыз бір сәтте тұра қалмайды. Онкүндік аясында станцияға жақын елдімекендерді аралап, тұрғындармен профилактикалық жұмыс жүргізіліп, теміржол бойындағы қауіпсіздік ережелері түсіндірілді. Мектеп оқушыларымен арнайы кездесіп, олардың сұрақтарына жауап берілді.
Мысалы, қозғалмай тұрған вагонның астынан өту неге қауіпсіз деген жасөспірімнің сауалына орай тоқтап тұрған пойыздың астынан бауырлап өту немесе вагондардың арасынан секіріп өту – ажалмен ойнаумен бірдей екені, құрам кез келген секундта сізге ескертусіз орнынан қозғалып кетуі мүмкін екені жан-жақты мысалдармен түсіндірілді.
Сонымен қатар бүгінгі таңда теміржол бойындағы қайғылы оқиғалардың көбі ғылыми күрделі себептерден емес, күнделікті өзіміз қолданып жүрген смартфон мен құлаққаптың салдарынан да орын алып жататыны ескертілді. Темір жол – балалардың ойын алаңы да, суретке түсетін фотодекорация да емес. Вагондардың үстіне шығу, жоғары кернеулі ток сымдарына жақындау немесе рельс бойымен серуендеу орны толмас өкінішке әкеледі.
Ерлан ҚУАНДЫҚОВ,
Алматы магистральдық желі бөлімшесі
Алматы-1 станциясының бас инженері