Маңғыстау және Павлодар облыстарында теміржол вокзалдарын қайта жаңарту аяқталды
«Қазақстан темір жолы» ҰК» АҚ Шетпе (Маңғыстау облысы) және Қарасор (Павлодар облысы) станцияларындағы теміржол вокзалдарын қайта жаңартуды аяқтады, деп хабарлайды Rail-news.kz.
Жұмыстар Қазақстан Республикасы Үкіметінің, Көлік министрлігінің және «Самұрық-Қазына» АҚ қолдауымен Мемлекет басшысының тапсырмаларын іске асыру шеңберінде компанияның өз қаражаты есебінен орындалды.
Шетпе станциясының вокзалы 1967 жылы салынған. Мұнда жаңа қаңқаны орнату, шатыр мен қасбетті жабу, инженерлік желілерді төсеу, үй-жайларды ішкі әрлеу және аумақты абаттандыру жұмыстары жүргізілді. Ғимаратта жаңа жиһаз бен заманауи жабдықтар орнатылған. Қазақстандық өндірістің материалдары пайдаланылды.
Вокзал ауданы бірнеше есеге: 201-ден 1090 шаршы метрге дейін ұлғайтылды. Ғимарат қауіпсіздіктің, энергия тиімділігінің және қол жетімділіктің заманауи талаптарына сәйкес келеді.
Вокзал 1 типті және күн сайын 100 жуық жолаушыға қызмет көрсетеді. Станция арқылы Семей, Қарағанды, Маңғыстау, Ақтөбе, Атырау және Орал бағыттары бойынша 16 жолаушылар пойызы қатынайды.
Қарасор станциясының вокзалы 1988 жылы салынған. Ғимаратта шатыр, қасбет және ішкі үй-жайлар жөнделді. Сумен жабдықтау, кәріз, жылыту, электрмен жабдықтау және байланыс жүйелері жаңартылды. Іргелес аумақ абаттандырылып, перрон жаңартылды.
Ғимаратта заманауи желдету және өрт қауіпсіздігі жүйелері орнатылған. Мобилділігі төмен жолаушылар үшін пандус, тактильді навигация және арнайы күту бөлмесі жабдықталған. Жолаушылар үшін жайлы күту аймақтары құрылды.
Вокзал 3-ші типке жатады. Станция арқылы Астана, Павлодар, Көкшетау, Шымкент және Түркістан бағыттары бойынша төрт жолаушылар пойызы қатынайды.
Вокзалдарды қайта құру жолаушыларға қызмет көрсетудің жайлылығы мен сапасын арттырды, сондай-ақ объектілердің қазіргі заманғы қауіпсіздік пен қолжетімділік стандарттарына сәйкестігін қамтамасыз етті.
