Кәсіби шыңдалу мектебі

Теміржол көлігінде сигнализация және байланыс саласы – қозғалыстың үздіксіздігі мен қауіпсіз жұмысын қамтамасыз ететін маңызды бағыттың бірі. Пойыздар қозғалысын бағдаршамдар, автоматты блоктау, бағыттамалар және басқа басқару құрылғылары арқылы реттеуде цифрлық технологияның рөлі жылдан жылға артып келеді.

Қызылорда сигнализация және байланыс дистанциясы базасында аймақтағы «СОБ құрылғыларында цифрлық аппаратураларды қолдану» тақырыбында тәжірибелік семинар өтті. Осы сала мамандарының кәсіби білімін арттырып, біліктілігін шыңдаған инновациялық семинарға өңірдегі екі дистанция өкілдері қатысып, сандық технологияны жүйеге қолдану ерекшеліктеріне сай озық тәжірибелерді меңгерді. Жиынды ашқан Қызылорда магистральдық желі бөлімшесінің СОБ, байланыс және электрмен жабдықтау секторының бастығы Р. Жасыбеков цифрландыру дәуіріндегі автоматика мен телемеханика құрылғыларының стратегиялық маңызына тоқталды. Бұл тұрғыда теория мен өндірістік тәжірибені ұштастыруда бүгінгі басқосудың берері көп екенін жеткізді. Ал Қызылорда сигнализация және байланыс дистанциясының бастығы Әбдірахман Сырғабаев өз баяндамасында мұндай практикалық алаңдардың саладағы қауіпсіздік деңгейін арттырудағы айрықша рөліне кеңінен тоқталды.  

Семинар барысында дистанция бастығының байланыс жөніндегі орынбасары Р.Нұрманов «Жөндеу-технологиялық учаскесінің жұмыс тәртібін баяндаса, еңбекті қорғау инженері А.Жаулыбаев автоматика құрылғыларына жөндеу жүргізу кезіндегі еңбек қауіпсіздігінің тәртібін сақтау талаптарын, БСД блогының релесіне регламенттік техникалық қызмет көрсету мен жөндеу сапасы инженері Г.Кенжеғұлова, ИВБ-М релесіне техникалық қызмет көрсетудің дәлдігі мен диагностика ерекшеліктері жайында Қ.Жоламанов және TM-RWD блогын жөндеуде микропроцессорлық стендтерді тиімді қолдану тәсілдері туралы Б.Ахметов кеңінен талқыға салып, нақты мысалдармен баяндады.  

Әрі қарай семинарға қатысушылар теориямен шектелмей, мекеменің контактісіз және релелік аппаратуралар бригадасының жұмысымен, сондай-ақ электр жетектерін жөндеу цехының жұмысымен танысып, әріптестерінің өндіріске заманауи құрылғыларды енгізу тәсіліне қанықты.  

– Бүгінгі таңда теміржол автоматикасы мен телемеханика жүйелерін цифрландыру – өндірістік қауіпсіздік пен пойыз қозғалысының үздіксіздігін қамтамасыз етудің басты кепілі. Осы тұрғыда бүгінгі тәжірибелік семинар кезекті хаттамамен шектеліп қалмай, күнделікті жұмысымыздың нақты іс-қимыл жоспарына айналуы тиіс. Алдағы уақытта цифрлық аппаратураларды пайдалану мен жөндеу кезінде нормативтік-техникалық құжаттама талаптарының бұлжытпай сақталуы басты назарда ұсталуы тиіс. СОБ құрылғыларының сенімділігін арттыру және жас мамандардың шеберлігін шыңдау мақсатында мұндай озық тәжірибе алмасу жиындарын тұрақты түрде өткізіп тұрамыз. Біздің басты мақсатымыз – цифрлық технологияның әрбір артықшылығын болат жолдың қауіпсіздігін нығайтуға бағыттау, – дейді дистанция бастығы Әбдірахман Сырғабаев.