Қараусыз мал: Маңғыстауда сегіз айда 6 рет мал басу оқиғасы тіркелді
Маңғыстау облысы бойынша меншікті тілші
Биылғы сегіз ай ішінде Маңғыстау жол дистанциясының аумағында алты рет пойызға мал басылу дерегі орын алды. Малдың кімге тиесілі екені анықталып, үш адам жауапкершілікке тартылды.
Өңірде соңғы кездері бағусыз жайылған ірі қара малдың теміржол бойына шығып кетіп, пойыз қозғалысына қауіп төндіру фактілері жиілеп кеткені дабыл қақтырып отыр. Маңғыстау жол дистанциясының жетекші жол инженері Ержан Артықбаевтың айтуынша, сөз болып отырған уақыт ішінде машинистер 96 рет шұғыл тежеу берген.
– Тиісті ережелерді ескермеген мал иелеріне ҚР Әкімшілік құқық бұзушылық туралы кодексінің 30-тарауы «Теміржол көлігінде қозғалыс қауіпсіздігін қамтамасыз ететін қағидаларды бұзу» туралы 559-бабына сәйкес айыппұл салынады. Малдың пойыз астына түсуі екі жаққа да қып-қызыл шығын. Қожайыны асырап отырған ақ-адал малынан бір айрылып, заңдық жауапкершілігін тағы арқалайды. Ал теміржолға қауіп-қатері мен материалдық шығыны тағы бар. Мәселен биылғы мал басу дерегінде бір рет тепловозға зақым келді. Түйе, жылқы немесе қара мал да осал жануар емес. Пойызға соғылу кезінде тепловоз алдындағы қаңылтыр бөлшегі майысады немесе сынады. Сондықтан тұрғындар төрт түлікті бақташыға бақтырса, темір жолдан әрлі-берлі малын айдап өткенде ереже сақтауды естен шығармауын сұраймыз, – дейді Ержан Артықбаев.
Маңғыстау дистанциясының мамандары ай сайын телімдерді аралап, малды ауылдарды жағалап, тұрғындарға профилактикалық жұмыстар жүргізуден кенде емес.
Сонымен қатар осы жылы 22 шақырымда жаңадан малға қоршау салу жоспарлаған. Қазір аталған орындарда құрылыстық шпалдармен қоршау орнату жұмыстары жүргізіліп жатыр. Енді тікенек сымдар келсе, жұмыс суық түспей бітеді дейді мамандар.