Исатайда – жаңа вокзал

Атырау облысында ГурьевАстрахань темір жолы төселген өткен ғасырдың жетпісінші жылдары бой көтерген Исатай станциясының вокзалы жаңадан салынып, пайдалануға берілді.

Көптен күткен вокзалдың ашылуына ауыл тұрғындары тайлы-тұяғы қалмай түгел жиналып, тамашалады. Жергілікті теміржолшылар, сала ардагерлері қатысқан жиында Исатай ауданының әкімі Н.Мусин, Атырау магистральдық желі бөлімшесінің басшысы А.Қосымбаев станция халқын жаңа нысанның ашылуымен құттықтады.  

Құрылысты жүргізген мердігер – «Теңізмұнайқұрылыс» компаниясы. Вокзал қайта жөндеуден кейін аумағы 129,3-тен 214,65 шаршы метрге дейін ұлғайды. Мұнда шатыр, инженерлік жүйелер, қасбет және ішкі үй-жайлар жаңартылды, жаңа жиһаздар мен жабдықтар орнатылды, іргелес аумақ абаттандырылды. Әрлеу үшін қазақстандық өндірістің заманауи материалдары қолданылды. 

Исатай станциясы аудан орталығынан 83, Атырау қаласынан 180 шақырым қашықта орналасқан. Қазақтың күрескер батыры Исатай Тайманов атындағы 4-ші класты станцияда екі мыңға жуық халық тұрады. 11 жылдық мектеп, медпункт, екі балабақша бар. Станция арқылы Исатайды Атыраумен, сондай-ақ Ресей, Өзбекстан және Тәжікстан бағыттарымен байланыстыратын 10 жолаушылар пойызы өтеді.  

Салтанатты жиында мердігер компания өкілдері мен вокзал қызметкерлеріне облыс әкімі атынан Алғыс хат табыс етілді.